Todos os artigos de Moncho

Escola Compostelá de Futebol Gaélico

Nasce a Escola Compostelá de Futebol Gaélico!

A seguir, toda a informaçom:
escola sueva

Futebol gaélico para nenas e nenos!
Com Marina Xestal!

Segundas feiras (luns) das 18h às 19h para crianças de 5 a 8 anos.

Segundas feiras (luns) das 19h15 às 20h15 para crianças de 9 anos em diante.

Grupo de 5 a 8 anos

O Futebol Gaélico desde a sua fundaçom é um desporto associado a valores de respeito tanto entre os companheiros e companheiras como com a árbitra. Neste grupo ajeitaremos os primeiros passos no gaélico à idade do grupo, por isso, trabalharemos sobretodo com jogos relacionados com a psicomotricidade para que pouco a pouco desenvolvam a capacidade física.

Também terá muito peso nos treinos a iniciaçom das nenas na equipa: compreender os valores da amizade, companheirismo, esforço… Todo isto por meio de jogos adatados para realizar umha atividade entretida para elas.

As aulas som impartidas por Marina Xestal, jogadora na Liga Gallaecia e integrante da equipa de Futebol Gaélico Suévia FG.

Grupo de 9 em diante

O Futebol Gaélico desde a sua fundaçom é um desporto associado a valores de respeito tanto entre os companheiros e companheiras coma com a árbitra. Neste grupo a compreensom da equipa é mais forte que nas crianças mais novas. A esta idade as nenas tenhem maior capacidade para assimilar conhecimentos relacionados com o gaélico, etom, começaremos com as tecnicas básicas.

Fica excluido o contacto, utilizaremos a versom adatada pola GAA para crianças desta idade, salientando os valores de equipa e respeito, e fazendo um jogo mais dinámico que nas categorias mais adultas. Também ensinaremos às crianças um correto desenvolvimento da atividade física.

As aulas som impartidas por Marina Xestal, jogadora na Liga Gallaecia e integrante da equipa de Futebol Gaélico Suévia FG.

No Campo de Futebol de Marroços (Rua do Carvalho de Aldrei, 50, 15893, A Corunha). Número mínimo de participantes: 6, e máximo: 13.

CURSOS DA SEMENTE PARA CRIANÇAS DE 2 A 12 ANOS
Informaçom dos cursos 2018-19

Começo a partir do 1 de outubro. Sem matrícula. 18€/mês para pessoas associadas a Semente e 20€/mês para nom associadas (menos regueifa que será de graça). Os pagamentos farám-se por domiciliaçom. Com inscriçom prévia em info@sementecompostela.com até 19 de setembro. Indicar nome da criança, idade, telefone e se sodes sócias da Semente

V aniversário da Liga Gallaecia

A Liga Gallaecia fai 5 anos e vamos celebra-lo o 22 de setembro com umha cheia cheia de atividades que nom vos podedes perder:
-começamos a jornada às 16h00 com umha exibiçom aberta de futebol gaélico no Campo de Cerqueirás (Mos)
-Continuamos às 19h00 com a palestra de Chris Boyle (jogador irlandês) “Questom social e nacional do futebol gaélico em Éire” no CSCD As Pedrinhas (Mos)
-Às 21h00 colhemos força com umha ceia, também no CSCD As Pedrinhas
-Acabamos com música e festa desde as 22h30 com os concertos de balde de
Zeltia a Celta
Solinho e Buyo

Verbena Velutina
Os Pazifestas
Flow do toxo

41437015_735686850098127_47154772360298496_n

Vemo-nos em Mos! Avante a Liga Gallaecia e o futebol gaélico.
Mil temporadas máis de desporto inclusivo e popular!

CRÓNICA DA VII JORNADA: GRUPO SUL

26952263_572372749762872_3644421522449905814_o

 

No passado sábado desputava-se mais umha jornada do grupo sul da Liga Gallaecia. Voltava o gaélico a um dos melhores campos da liga, o da Canosa, no concelho do Rosal, numha tarde bastante fria e húmida.

A jornada foi aberta com o encontro entre Gróvias e Ambilokwoi. As anfitrionas conseguiam ganhar o jogo com um marcador de 30 a 5 pontos, resultado que continua a reafirmar a boa temporada das do Baixo Minho e que as continua a manter na luita polos postos de playoff. Ambilokwoi voltava a deixar muito boa impressom e malia a pontuaçom, nunca baixa os braços demonstrando assim a plena coerência com os valores da Liga.

De seguido, começava o encontro entre o Condado e Suévia. Umha vitória nesse jogo deixaria praticamente classificadas às de Compostela mas topárom com um Condado que nom lhes deu nengumha oportunidade. Para surpresa de toda a gente, o Condado dominou o encontro de princípio a fim e levou umha clara vitória por 28 a 1, que coloca mais umha vez, às do Condado na luita polo playoff.

Para finalizar a jornada, as companheiras de Gróvias preparárom um estupendo terceiro tempo no CS O Fuscalho da Guarda.

 

 

25 DE NOVEMBRO DIA CONTRA O TERRORISMO MACHISTA

O terrorismo machista tem incontáveis formas de se manifestar e como tal, também múltiplas maneiras e espaços desde onde o podemos combater.

O desporto é o espaço que a Liga Gallaecia escolheu e a prática mista e inclusiva, a nossa particular maneira de contribuír a debilitar o Patriarcado.

E é que a nossa Liga tem umha tarefa que vai muito para além da própria prática desportiva. No dia a dia da Liga Gallaecia estamo-nos a demonstrar que o género nom age como eixo da diferença, que todas e todos somos diversas na individualidade para igualar-nos na coletividade. Interagimos, cooperamos, complementamo-nos e coordenamos capacidades individuais para que o verdadeiramente importante seja o resultado coletivo.

É assim que chegamos a comprovar na prática a falsidade dos preconceitos que nos atribuem às mulheres menos capacidades físicas que os homens, ou capacidades muito diferentes que impossibilitariam umha competiçom mista justa. Constatamos como vamos desprendendo-nos de velhas atitudes machistas ao tempo que detetamos outras novas e mais subtis e trabalhamos por erradicá-las. Aprendemos a automatizar o respeito como atitude básica no relacionamento social. E nom menos importante, construímos um espaço de auto-proteçom, de convívio e de divertimento fundamental para manter o ánimo e resistir ao terrorismo machista desde todos os outros espaços.

Eis que vamos deixando de ver a jogadora mulher ou o jogador homem, para simplesmente ver pessoas, passo imprescindível para construír umha sociedade igualitária.

23737743_544251449241669_2165765388127682249_o

Jornada de iniciaçom ao Futebol Gaélico na Corunha

Desde a Liga Gallaecia convidamos-vos a participar nesta Jornada de Iniciaçom ao Futebol Gaélico, que forma parte do “Programa Nocturnia” levado a cabo pola equipa de Cascarilha Futebol Gaélico desde o Concelho da Corunha o sábado 18 de novembro de 21:00 a 23:00 na Cidade Desportiva de Riazor.
Se tes entre 12 e 30 anos nom duvides em apontar-te e ter a oportunidade de conhecer este fantástico desporto. Inscribide-vos no enlace que aparece abaixo. É de balde! 😉
Agardamos-vos!

https://www.coruna.gal/…/iniciacion-a…/suceso/1453634232805…

Aprobeitamos para destacar a mágoa que sentimos de que o concelho da Corunha nom empregue o galego para difundir este tipo de atividades.

Apresentaçom da temporada 2017-2018

22181470_523878304612317_496750150115780126_o
Este ano, a Liga Gallaecia superou todas as expetativas e orgulhamo-nos de poder contar com mais quatro equipas novas e um total de dez em toda a competiçom.
É um bom sintoma, sem dúvida, já nom só porque quer dizer que algo estaremos a fazer bem, senom também porque a sociedade está a ver que se pode fazer desporto de outro jeito longe do segregacionismo e o mercantilismo imperante, que se pode fazer desporto participativo, saudável e popular. A Liga Gallaecia é hoje um projeto desportivo que aguardamos consolidar mais fortemente com o passo dos anos, e como sempre dizemos, em contínuo processo de aprendizagem.
Com isto queremos apresentar-vos umha nova temporada de futebol gaélico na que tivemos que modificar o modelo que até agora tinhamos de monogrupo e dividir-nos, por praticidade, seguindo o critério da proximidade geográfica. Assim é que contaremos com dous grupos, o norte e o sul, que competirám entre eles numha primeira fase da Liga. Posteriormente, haverá umha segunda fase na que as duas primeiras classificadas de cada grupo da primeira fase e a melhor das terceiras, desputarám o título de liga no Grupo Final I; e as cinco equipas restantes continuarám a competiçom no Grupo Final II.
O Grupo Norte estará assim formado polas equipas das seguintes comarcas: Eume (Fusquenlha Futebol Gaélico), A Corunha (Cascarilha Futebol Gaélico e as Fanecas Bravas Futebol Gaélico), Lugo (Torques de Lugoslavia Futebol Gaélico) e Sárria (Buril Futebol Gaélico).
O Grupo Sul formam-no equipas das comarcas de: Ourense (Afiadoras Futebol Gaélico), Vigo (Ambílokwoi Futebol Gaélico), Condado (Condado Futebol Gaélico), Baixo Minho (Gróvias Futebol Gaélico) e Compostela (Suévia Futebol Gaélico).
Isto começa! Nom duvidedes de participar na vossa comarca!
Avante o futebol gaélico! Avante a Liga Gallaecia!