Crónica da I Jornada

IJornada

O passado sábado dia 5 de outubro, numha jornada marcada pola soalheira do sol do outono, inaugurava-se nos campos de Nadela a Liga Gallaecia, primeira competiçom mista da história do futebol gaélico, com a participaçom das corajosas equipas Afiadoras (Ourense), Cascarilha (Corunha), Suévia (Compostela) e Torques (Lugo).

Primeira liga mista do Futebol Gaélico:

Nascido na Irlanda, o futebol gaélico é o desporto mais popular daquele país conservando férreas regras sobre a condiçom amadora dos jogadores e fugindo de um sistema que tenciona pôr os desportos ao serviço do capital.

Na Galiza, após a criaçom de diferentes conjuntos masculinos e femininos reconhecidos pola Associaçom Atlética Gaélica (GAA), surgiu ainda a necessidade paralela de criar um desporto de base que promovesse a integraçom desportiva de homens e mulheres.

Com esta ideia em mente, as equipas envolvidas neste processo (Afiadoras, Cascarilha, Faísca, Suévia e Torques) anunciárom no 7 de agosto em Compostela a eminente criaçom da Liga Gallaecia, competiçom mista em que participam indistintamente homens e mulheres que tencionam rachar com os roles de género avançando no caminho da igualdade.

Depois do jogo tem ainda forte importância o chamado terceiro tempo, jornada de convívio entre os e as participantes da liça desportiva que deverá organizar a equipa local.

Primeira jornada da Liga Gallaecia:

Abrigados do vento por umha deleitosa carvalheira e com o fulgente astro rei acima das testas juntavam-se no meio do campo sob a marcha do antigo reino da Galiza as equipas participantes na primeira jornada, com excepçom das Afiadoras, que chegárom mais tarde.

Suévia – Cascarilha

Minutos depois, às 17h00, o Cascarilha –que chegou com três lesionados ao campo e sem jogadores de recâmbio- punha a bola em andamento acusando, a seguir, a falta de efetivos e recolhendo umha chuva de golos do fundo das redes. O Suévia foi claro dominador do encontro mostrando maior controlo do jogo durante a primeira metade.

A história, contodo, deverá lembrar o nome da primeira mulher que participou no jogo inicial da primeira liga mista da história do futebol gaélico, a valente Patrícia Fidalgo do Cascarilha.

Torques – Afiadoras

Às 19h00 saltavam à relva as equipas de Lugo, em condiçom de locais, e Ourense no que viria a ser o jogo mais emocionante da tarde. Com um futebol de combinaçom por parte de ambas equipas e forte intensidade física durante as duas partes do encontro, a pugna viraria do lado dos Torques de Lugoslávia nos últimos minutos do jogo, desatando a emoçom da torcida local, que coloriu as bancadas com botes de fumo, cartazes e animados cânticos de apoio.

Terceiro tempo:

Os Torques de Lugoslávia brindárom umha afetuosa e fraternal acolhida às equipas convidadas com bebida, petiscos e música no local social da Associaçom Cultura do País. As mais resolutas achegárom-se ainda às festas do Sám Froilám, que tinham lugar a escassos metros do lugar.

Resultados da primeira jornada:

1ª – (2 pontos) Suévia

2ª – (2 pontos) Torques

3ª – (0 pontos) Afiadoras

4ª – (0 pontos) Cascarilha

A equipa de Compostela lidera a competiçom no fim desta primeira jornada empatada a pontos com os Torques de Lugoslávia. Fecham a concorrência as Afiadoras de Ourense e o Cascarilha da Corunha.

Eis os resultados:

Suévia 14-8, Cascarilha 1-0

Torques 4-4, Afiadoras 3-2

Crónica do Diário Liberdade